Yadda Zaka Sarrafa Sha’awar Jima’i Idan Ba Kada Aure

YADDA ZAKA SARRAFA SHA’AWAR JIMA’I IDAN BAKA DA AURE

Sha’awar jima’i wani bangare ne na dabi’ar dan Adam, musamman idan mutum ya balaga.

Amma idan baka da aure, yana da muhimmanci ka san yadda zaka tafiyar da wannan sha’awa cikin hikima da mutunci domin kada ta jefa ka cikin nadama ko matsalolin rayuwa.

Mutane da yawa suna fuskantar wannan kalubale, musamman a wannan zamani da abubuwan tayar da sha’awa suka yawaita a kafafen sada zumunta da rayuwar yau da kullum.

Sai dai akwai hanyoyi masu anfani da za su taimaka maka wajen sarrafa kanka.

1. Ka Guji Abubuwan Da Ke Tayar Da Sha’awa

Kallon bidiyoyi marasa kyau, hotuna ko yawan tattaunawar batsa na daga cikin abubuwan da ke kara wa mutum sha’awa. Idan kana son samun natsuwa, ka rage kallon abubuwan da ke tada maka hankali.

Abin da ido yake gani yana da tasiri sosai ga tunanin mutum.

2. Ka Kasance Kana Aiki Ko Shagaltuwa

Yawan zama babu aiki yana kara wa mutum tunani marasa anfani. Ka shagaltu da aiki, kasuwanci, karatu ko koyon wata sana’a domin kwakwalwarka ta fi mayar da hankali ga cigaban rayuwa.

3. Yin Motsa Jiki

Motsa jiki yana taimakawa wajen rage damuwa da yawan tunani. Haka kuma yana sa jiki ya fitar da kuzari ta hanya mai anfani.

Mutane masu motsa jiki akai-akai sukan fi samun natsuwar zuciya.

4. Ka Guji Yawan Kadaici

Yawan zama kai kadai musamman cikin dare kan kara tunanin sha’awa. Ka kasance kana hulda da iyali ko abokai nagari masu anfani.

5. Yin Azumi Da Kula Da Addini

Ibada da kusanci da Allah suna taimakawa mutum wajen samun karfin zuciya da sarrafa sha’awa. Haka kuma azumi yana taimakawa wajen rage yawan motsin sha’awa.

6. Ka Zabi Abokai Nagari

Abokai na da tasiri sosai. Idan kana tare da mutanen da maganarsu kullum tana kan batsa ko iskanci, hakan na iya kara tayar maka da hankali.

7. Ka Shirya Rayuwarka Domin Aure

Idan ka kai lokacin aure kuma kana da hali, yana da kyau ka fara shirya rayuwarka domin neman halal.

Aure yana taimakawa wajen samun nutsuwa da kare mutum daga fadawa abubuwan da ba su dace ba.

Sha’awar jima’i dabi’a ce ta rayuwa, amma sarrafa kai shi ne abin da ke nuna tarbiyya da hankali.

Duk wanda ya koyi yadda zai tafiyar da kansa cikin hikima yana kare mutuncinsa da lafiyarsa.

Allah ya ba mu ikon kiyaye kanmu da rayuwa cikin tsari mai kyau.

Shiga Nan Domin Karin Bayani